मधेस प्रदेशका मुख्यमन्त्री यादवविरुद्धको मुद्दा पुनः हेर्दाहेर्दैमा

काठमाडौं । मधेस प्रदेशका मुख्यमन्त्री सरोजकुमार यादवको नियुक्ति र सपथविरुद्ध दायर रिटमा शुक्रबार पनि सुनुवाइ  नसकिएपछि मुद्दा पुनः ‘हेर्दाहेर्दै’मा राखिएको छ।

यसअघि बिहीबार पनि इजलासले मुद्दा निष्कर्षमा नपुगेको भन्दै हेर्दाहेर्दैमा राखेको थियो। शुक्रबारको सुनुवाइमा पनि दुवै पक्षका वकिलहरूले आफ्नो तर्क राखे तर बहस टुंगिन नसकेपछि न्यायाधीशद्वय हरिप्रसाद फुयाँल र नित्यानन्द पाण्डेको संयुक्त इजलासले फेरि पनि हेर्दाहेर्दैमा राख्ने निर्णय गरेको हो।

मुख्यमन्त्री यादवको नियुक्ति असंवैधानिक भएको दाबी गर्दै कांग्रेस संसदीय दलका नेता कृष्णप्रसाद यादवसहित ७४ सांसदले रिट दायर गरेका छन्। यसअघि सर्वोच्च अदालतले मुख्यमन्त्री यादवलाई मधेस प्रदेशमा दीर्घकालीन प्रभाव पार्ने कुनै पनि नीतिगत निर्णय नगर्न अन्तरिम आदेशसमेत जारी गरिसकेको छ।