पत्रकार ऐश्वर्या कुँवर वडाध्यक्षमाथि अभद्र व्यवहार मुद्दामा पक्राउ

कञ्चनपुर । भीमदत्त नगरपालिका–१८ का वडाध्यक्ष रवीन्द्र देवकोटामाथि दुर्व्यवहार तथा कुटपिट गरेको आरोपमा पत्रकार ऐश्वर्या कुँवर पक्राउ परेकी छन् ।

आइतबार महेन्द्रनगरस्थित एक होटलमा आयोजित कार्यक्रममा वडाध्यक्ष देवकोटा र कुँवरबीच विवाद भएको थियो । सो क्रममा कुँवरले देवकोटाको घाँटी समातेर प्रहार गरेको भनिएको भिडियो सामाजिक सञ्जालमा सार्वजनिक भएपछि घटना चर्चामा आएको हो ।

घटनापछि वडा प्रहरी कार्यालयको टोली घटनास्थलमा पुगेर कुँवरलाई नियन्त्रणमा लिएको थियो । वडाध्यक्ष देवकोटाले कुँवरविरुद्ध अभद्र व्यवहार कसुरमा किटानी जाहेरी दिएका छन् ।

जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक टेकबहादुर रावतले जाहेरीका आधारमा कुँवरलाई हिरासतमा राखी थप अनुसन्धान तथा कानुनी प्रक्रिया अघि बढाइएको जानकारी दिए ।

प्रहरीका अनुसार घटनाबारे थप अनुसन्धान भइरहेको छ ।