उपरजिष्ट्रार पराजुलीको निधन, उच्च अदालत पाटनमा सबै इजलास स्थगित

ललितपुर । उच्च अदालत पाटनका उपरजिष्ट्रार (रा.प. द्वितीय) डिल्लीप्रसाद पराजुलीको असामयिक निधन भएपछि मंगलबारका लागि तय गरिएका सबै इजलासका सुनुवाइ स्थगित गरिएको छ ।

अदालतले मंगलबार सूचना जारी गर्दै उपरजिष्ट्रार पराजुलीको २०८३ असार १६ गते निधन भएको जनाउँदै शोकका कारण आजका सम्पूर्ण इजलासबाट हुने मुद्दाको सुनुवाइ स्थगित गरिएको जनाएको हो ।

सूचनाअनुसार स्थगित भएका मुद्दासम्बन्धी जानकारीका लागि सम्बन्धित शाखामा सम्पर्क गर्न सरोकारवालासँग अनुरोध गरिएको छ ।

उच्च अदालत पाटन परिवारले सूचना जारी गर्दै स्वर्गीय पराजुलीप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरेको छ ।