एलएल.एम.को परीक्षाफल ७ दिनमै प्रकाशित

काठमाडौं । त्रिभूवन विश्वविद्यालय कानून संकाय, डीन कार्यालयले विगतमा ८ महिनादेखि एक वर्षसम्म लगाउने गरेको एलएल.एम.को परीक्षाको नतिजा यसपटक सात दिनमै प्रकाशित गरेर रेकर्ड कायम गरेको छ ।
त्रिवि कानुन संकायको डीन कार्यालयले गत मंसिर ९ गते सञ्चालित एलएल.एम. तह ( ४ सेमेष्टर समूह) को दोस्रो सेमेष्टर र एलएल.एम. तह (६ सेमेष्टर समुह) को दोश्रो सेमेष्टरका नियमित र आशिंक दुवैको नतिजा सोमबार (मंसिर १५ गते) प्रकाशित गरेको हो ।

त्रिवि कानुन संकायका सहायक डीन केशरमणि अर्यालका अनुसार त्रि.वि.कानुन संकायका नवनियुक्त डीन प्रा.डा. डीएन पराजुलीको कार्ययोजना बमोजिम सातै दिनमा नतिजा प्रकाशन सम्भव भएको हो ।

कानुन संकायले सञ्चालन गर्ने सेमेष्टर प्रणालीअन्र्तगतका परीक्षाहरुको सञ्चालन र नतिजा शैक्षिक कार्यतालिका बमोजिम निर्धारित समयमा गर्ने रहेको अर्यालले बताए ।

उनले भने, ‘डीन कार्यालयले लिने सेमेष्टर प्रणालीअन्र्तगतका सबै तहका परीक्षाहरुको नतिजा परीक्षा समाप्त भएको मितिले ६० दिनभित्रमा गरिसक्ने नीति रहेको छ ।’

त्यसैगरी, नेपाल ल क्याम्पसका उप–प्राध्यापक सरोजकुमार गिरीका अनुसार विगतमा नतिजा प्रकाशन गर्न ८–९ महिनासम्म लाग्ने गरेको थियो, जसका कारण विद्यार्थीको भविष्यमा नकारात्मक असर पर्नुका साथै मनोवैज्ञानिक समस्या समेत सिर्जना हुने गरेको थियो ।

कानून संकाय, डीनको कार्यालयले पाँचवर्षे बीए.एलएल.बी.र एलएल.एम. तीनवर्षे र दुई वर्षे) को परीक्षा सञ्चालन र नतिजा प्रकाशन गर्दै आएको छ ।