पूर्वगृहमन्त्री रमेश लेखकमाथिकाे स्थान हद फुकुवा

काठमाडौं । भदौ २३ र २४ गते घटेका घटनाको छानबिन गरिरहेको जाँचबुझ आयोगले पूर्वगृहमन्त्री रमेश लेखकमाथिकाे स्थान हद फुकुवा गर्न गृहमन्त्रालयलाई पत्रचार गरेको छ।

जाँचबुझ आयोगको सचिवालयले गृह मन्त्रालयलाई पत्र पठाउँदै आयोगको अनुसन्धान दायराभित्र रहे पनि पूर्वगृहमन्त्री लेखकको विदेश भ्रमण र काठमाडौं उपत्यका छाड्न नपाउनेसम्बन्धी व्यवस्था फुकुवा गर्न अनुरोध गरेको हो।

आयोगका अनुसार यसअघि भदौ १२ गते बसेको बैठकले अनुसन्धानका क्रममा पूर्वगृहमन्त्री लेखकको विदेश भ्रमणमा रोक लगाउने र काठमाडौं उपत्यका छाड्न नपाउने निर्णय गरेको थियो। तर हाल सो निर्णयको उद्देश्य पूरा भइसकेकाले उक्त व्यवस्था फुकुवा गर्नुपर्ने निष्कर्षमा आयोग पुगेको पत्रमा उल्लेख छ।

आयोगले मिति २०८२ पुस १७ गते निर्णय गर्दै पूर्व निर्णयअनुसार लगाइएको रोक हटाइदिन गृह मन्त्रालयलाई औपचारिक जानकारी गराएको हो।

उक्त पत्र प्रधानमन्त्री तथा मन्त्रिपरिषद् कार्यालय, संघीय मामिला तथा सामान्य प्रशासन मन्त्रालय, परराष्ट्र मन्त्रालय, नेपाल प्रहरी प्रधान कार्यालय तथा पूर्वगृहमन्त्री रमेश लेखकलाई समेत बोधार्थ पठाइएको छ।

याे पनि –

‘रमेश लेखकको बयान सकियो, केपी ओलीलाई बोलाउने तयारी हुँदैछ’ : जाँचबुझ आयोग अध्यक्ष कार्की