विमानस्थलमा अख्तियारकाे छापा : भन्सार अधिकृत न्यौपानेसहित तीन जना कर्मचारी घुससहित पक्राउ

काठमाडौँ । त्रिभुवन अन्तर्राष्ट्रिय विमानस्थलमा कार्यरत भन्सार अधिकृत इन्द्र न्यौपानेसहित तीन जना कर्मचारी घुस लिएको आरोपमा अख्तियार दुरुपयोग अनुसन्धान आयोगको नियन्त्रणमा परेका छन् । अख्तियारले उनीहरूको साथबाट दुई लाख ६८ हजार २८८ रुपैयाँ नगद र २३ थान मोबाइल फोन बरामद गरेको जनाएको छ ।

पक्राउ पर्नेमा सञ्चार मन्त्रालयबाट खटिएका हुलाक सेवा विभाग गोश्वारा हुलाक कार्यालय निकासी शाखाका नायब सुब्बा छविप्रसाद रिजाल र कार्यालय सहयोगी गणेशप्रसाद पुडासैनी पनि रहेका छन् । अख्तियारका अनुसार सेवाग्राहीबाट घुस लिएको सूचनाका आधारमा टोली खटाई उनीहरूलाई रंगेहात नियन्त्रणमा लिइएको हो  ।

कार्यालय सहयोगी पुडासैनीको कार्यकक्ष र निवासबाट करिब एक लाख ४६ हजार रुपैयाँ तथा नासु रिजालको साथबाट ३८ हजार ८४८ रुपैयाँ बरामद भएको अख्तियारले जनाएको छ। तीनै जनाले मिलेमतोमा घुस लिई बाँडफाँट गर्ने तयारीकै क्रममा पक्राउ परेको बताइएको छ ।

अख्तियारले बरामद गरिएका मोबाइल फोनहरू थप अनुसन्धानका लागि विधिविज्ञान प्रयोगशालामा पठाउने तयारी गरेको छ। घटनाबारे थप अनुसन्धान भइरहेकाे आयोगले जनाएको छ।