प्रस्तावित प्रधानन्यायाधीश डा. मनोजकुमार शर्माविरुद्ध तीन उजुरी

काठमाडौं । संवैधानिक परिषद्‌बाट  प्रधानन्यायाधीशका लागि सिफारिस भएका डा. मनोजकुमार शर्माविरुद्ध तीनवटा उजुरी परेका छन् ।

संसदीय सुनुवाइ समितिले शुक्रबार बैठक बसेर डा. शर्माविरुद्ध उजुरी आह्वान गर्ने निर्णय गरेको थियो । समितिले जेठ ४ गतेसम्म उजुरी दिन १० दिनको समय दिएको छ। उजुरी दिने म्याद भने जेठ ४ गतेसम्म कायम छ ।

समितिले उजुरीका लागि विभिन्न सुविधाजनक व्यवस्था गरेको छ । नाम उल्लेख गरेर वा नाम नखुलाईकन  दुवै तरिकाले उजुरी दिन सकिनेछ । उजुरी सचिवालयमा प्रत्यक्ष, इमेलबाट, खामबन्दी गरी सिंहदरबार वा ७७ वटै जिल्ला प्रशासन कार्यालयमार्फत पठाउन सकिने व्यवस्था छ ।

समितिले उजुरीमा विषयवस्तु स्पष्ट खुलाउन र प्रमाणसहित पेश गर्न आग्रह गरेको छ ।

समितिले जेठ ५ गते अर्को बैठक बोलाएको छ । उक्त बैठकमा प्राप्त उजुरीहरू सदस्यहरूको रोहबरमा खोलिनेछन् र अध्ययनका लागि वितरण गरिनेछ । त्यसपछि सुनुवाइ प्रक्रिया कसरी अगाडि बढाउने भन्ने निर्णय हुनेछ ।

संसदीय सुनुवाइ समितिले अनुमोदन गरेपछि राष्ट्रपतिबाट डा. मनोजकुमार शर्मालाई प्रधानन्यायाधीशमा नियुक्ति गरिनेछ ।