पोखरा विमानस्थल भ्रष्टाचार प्रकरण : पूर्वमहानिर्देशक सञ्जीव गौतम डिल्लीबजार कारागार चलान

काठमाडौँ । नेपाल नागरिक उड्डयन प्राधिकरणका पूर्वमहानिर्देशक सञ्जीव गौतमलाई डिल्लीबजार कारागार पठाइएको छ । विशेष अदालतको आदेशअनुसार उनलाई पुर्पक्षका लागि थुनामा राखिएको हो ।

पोखरा अन्तर्राष्ट्रिय विमानस्थल निर्माणसँग सम्बन्धित भ्रष्टाचार मुद्दामा मुछिएका गौतमलाई मङ्गलबार विशेष अदालतले थुनामा पठाउने आदेश दिएको थियो । आदेश न्यायाधीशहरू नारायणप्रसाद पौडेल, हेमन्त रावल र डिल्लीरत्न श्रेष्ठको इजलासबाट भएको हो ।

उक्त प्रकरणमा अख्तियार दुरुपयोग अनुसन्धान आयोगले गौतमविरुद्ध भ्रष्टाचार मुद्दा दायर गरेको थियो । आयोगले उनीबाट ६ करोड ७३ लाख ९९ हजार ६४८ रुपैयाँ बराबरको बिगो मागदाबी गरेको जनाएको छ ।

यसै मुद्दासँग सम्बन्धित नेपाल नागरिक उड्डयन प्राधिकरणका अर्का पूर्वमहानिर्देशक प्रदीप अधिकारी पनि हाल डिल्लीबजार कारागारमा रहेको जनाइएको छ ।