यी हुन् विष्णु पौडेलको मुद्दामा सर्वोच्चले झिकाउनू भनेका ५ फायल

काठमाडौँ । सर्वोच्च अदालतले नेकपा एमालेका उपाध्यक्ष विष्णु पौडेलको बन्दीप्रत्यक्षीकरण रिटमाथि सुनुवाइ गर्दै उनीसँग सम्बन्धित विभिन्न मुद्दाका पाँच वटा फाइल झिकाउन आदेश दिएको छ ।

न्यायाधीशद्वय टेकप्रसाद ढुंगाना र मेघराज पोखरेलको संयुक्त इजलासले मंगलबार दिएको आदेशमा सम्पत्ति शुद्धीकरण, बैंकिङ कसुर, बीमा कसुर तथा चिट्ठोपत्रसम्बन्धी कसुरका मुद्दाका मिसिलहरू झिकाउन भनिएको हो । साथै व्यवसायी दीपक भट्टले दायर गरेको बन्दीप्रत्यक्षीकरण रिटको मिसिलसमेत अध्ययनका लागि झिकाउन आदेश भएको छ।

सर्वोच्चले झिकाउन भनेका फाइलहरू यस्ता छन्–

• विष्णु पौडेलसमेत प्रतिवादी रहेको सम्पत्ति शुद्धीकरण मुद्दा (विशेष अदालतबाट) ।
• विष्णु पौडेलसमेत प्रतिवादी रहेको बैंकिङ कसुर मुद्दा (उच्च अदालत पाटनबाट) ।
• आशिष श्रेष्ठसमेत प्रतिवादी रहेको बीमा सम्बन्धी कसुर मुद्दा (काठमाडौं जिल्ला अदालतबाट) ।
• सुलभ अग्रवालसमेत प्रतिवादी रहेको चिट्ठोपत्र सम्बन्धी कसुर मुद्दा (काठमाडौं जिल्ला अदालतबाट) ।
• दीपक भट्टसमेत प्रतिवादी रहेको चिट्ठोपत्र सम्बन्धी कसुर मुद्दा (काठमाडौं जिल्ला अदालतबाट) ।

त्यसैगरी, दीपक भट्टले नेपाल सरकार, गृह मन्त्रालयलगायतलाई विपक्षी बनाई दायर गरेको बन्दीप्रत्यक्षीकरण रिट निवेदनको मिसिल पनि अभिलेख शाखाबाट झिकाई अवलोकनार्थ संलग्न राख्न आदेश दिइएको छ ।

यसअघि सर्वोच्च अदालतले विष्णु पौडेललाई पक्राउ गर्नुको कारण पेश गर्न विपक्षी निकायहरूका नाममा आदेश जारी गरेको थियो । पौडेलकी पत्नी दोमाया पौडेलले दायर गरेको बन्दीप्रत्यक्षीकरण रिटमा थप अध्ययन आवश्यक देखिएपछि अदालतले सम्बन्धित मुद्दाका मिसिलहरू झिकाउन आदेश दिएको हो ।

आदेश हेर्नुहाेस् :