एमालेका पूर्वसांसद कोइरीलाई पक्राउ गर्नुको कारण पेस गर्न सरकारका नाममा सर्वोच्चको आदेश

काठमाडाैँ । सर्वोच्च अदालतले नेकपा एमालेका पूर्वसांसद लक्ष्मी महतो कोइरीलाई पक्राउ गरी कैद कार्यान्वयन गर्नुको आधार पेश गर्न सरकारका नाममा आदेश दिएको छ ।

न्यायाधीश नित्यानन्द पाण्डेयको एकल इजलासले कोइरीका छोरा मनोजकुमार महतोले दायर गरेको बन्दीप्रत्यक्षीकरण रिटमाथि सुनुवाइ गर्दै पक्राउ तथा थुनासम्बन्धी कागजातसहित लिखित जवाफ पेश गर्न आदेश दिएको हो ।

थमन विक हत्या प्रकरणमा उच्च अदालत जनकपुरले गत साता कोइरीलाई पाँच वर्ष कैद सजाय सुनाएको थियो । उक्त फैसलापछि प्रहरीले उनलाई पक्राउ गरी कैद कार्यान्वयन प्रक्रिया अघि बढाएको थियो ।

रिट निवेदनमा भने उच्च अदालतको फैसला अन्तिम नभइसकेको अवस्थामा कोइरीलाई पक्राउ गरिएको भन्दै त्यसलाई गैरकानुनी भएको जिकिर गरिएको छ । निवेदकले १० वर्षभन्दा कम कैद सजाय भएका प्रतिवादीले धरौटीमा रही सर्वोच्च अदालतमा पुनरावेदन गर्न पाउने कानुनी व्यवस्था रहेको दाबी गरेका छन् ।

उच्च अदालत जनकपुरका कामु मुख्यन्यायाधीश टेकनारायण कुँवर र न्यायाधीश मुरारीबाबु श्रेष्ठको इजलासले जिल्ला अदालतको फैसला उल्ट्याउँदै कोइरीलाई दोषी ठहर गरेको थियो । मधेश आन्दोलनका क्रममा घाइते सशस्त्र प्रहरी सहायक निरीक्षक थमन विकको हत्या घटनामा संलग्न रहेको ठहर गर्दै अदालतले उनलाई पाँच वर्ष कैद सजाय सुनाएको थियो ।