देउवा पुत्रलाई सम्पत्ति शुद्धीकरण विभागले भन्यो– सात दिनभित्र उपस्थित हुनू

काठमाडौँ । सम्पत्ति शुद्धीकरण अनुसन्धान विभागले नेपाली कांग्रेसका निवर्तमान सभापति तथा पूर्वप्रधानमन्त्री शेरबहादुर देउवा र पूर्व परराष्ट्रमन्त्री आरजु देउवा राणाका छोरा जयवीर देउवालाई सात दिनभित्र उपस्थित हुन सार्वजनिक सूचना जारी गरेको छ ।

विभागले मंगलबार प्रकाशित सूचनामार्फत सम्पत्ति शुद्धीकरण कसुरको अनुसन्धानका क्रममा जयवीर देउवासँग केही कुरा बुझ्नुपर्ने भएकाले कार्यालयमा उपस्थित हुन निर्देशन दिएको हो ।

सूचनामा डडेलधुरा जिल्ला साविक आलिताल गाविस–५ स्थायी घर भई हाल काठमाडौं महानगरपालिका–३२ बस्ने जयवीर देउवा वा उनका वारेसलाई सूचना प्रकाशित भएको मितिले सात दिनभित्र ललितपुरको पुल्चोकस्थित विभागको कार्यालयमा उपस्थित हुन भनिएको छ ।

सम्पत्ति शुद्धीकरण (मनी लाउन्डरिङ) निवारण ऐन, २०६४ को दफा १७ बमोजिम सूचना जारी गरिएको विभागले जनाएको छ ।

निर्धारित अवधिभित्र उपस्थित नभए प्रचलित कानूनबमोजिम आवश्यक प्रक्रिया अघि बढाइने चेतावनी विभागले दिएको छ ।

विभागले अनुसन्धानको प्रकृति वा विषयवस्तुबारे थप विवरण भने सार्वजनिक गरेको छैन ।