सपना प्रधान मल्ल पुनः कायम मुकायम प्रधानन्यायाधीश

काठमाडौँ । सर्वोच्च अदालतको कायम मुकायम प्रधानन्यायाधीशको जिम्मेवारी पुन: न्यायाधीश सपना प्रधान मल्लले पाएकी छन् ।

प्रधानन्यायाधीश डा. मनोज कुमार शर्मा छिमेकी राष्ट्र भारतको औपचारिक भ्रमणमा निस्किएपछि मल्लले उक्त जिम्मेवारी पाएकी हुन् ।

प्रधानन्यायाधीश शर्मा भारतका प्रधानन्यायाधीश सूर्य कान्तको निमन्त्रणामा बिहीबार भारतको राजधानी नयाँ दिल्ली प्रस्थान गरेका हुन् । धर्मपत्नी उमा शर्मा र सह रजिस्ट्रार अमित उप्रेतीसहित भ्रमणमा गएका प्रधानन्यायाधीश शर्माले भारतको सर्वोच्च अदालतको समेत भ्रमण गर्ने तालिका रहेको छ ।

कामु प्रधानन्यायाधीशको जिम्मेवारी पाएकी मल्ल प्रधानन्यायाधीश शर्मालाई बिदाइ गर्न बिमानस्थलसम्म पुगेकी थिइन् ।

डा. शर्मा साउन ११ गते नेपाल फर्कने कार्यक्रम रहेको छ ।

यसअघि पनि प्रधानन्यायाधीश प्रकाशमान सिंह राउत ६५ वर्षको उमेर हदका कारण अनिवार्य अवकाश भएसँगै न्यायाधीश सपना प्रधान मल्लले कायम मुकायम प्रधानन्यायाधीशको जिम्मेवारी सम्हालिसकेकी छन् ।