१२ हजार घुससहित रंगेहात पक्राउ परेका सिरहाका वन अधिकृत विरुद्ध मुद्दा दायर

काठमाडौँ । सिरहाको सब-डिभिजन वन कार्यालय बन्दीपुरका कार्यालय प्रमुख राम केवल राय यादवलाई सेवाग्राहीसँग १२ हजार रुपैयाँ घुस लिइरहेको अवस्थामा अख्तियार दुरुपयोग अनुसन्धान आयोगले रंगेहात पक्राउ गरी विशेष अदालतमा आरोपपत्र दायर गरेको छ ।

आयोगका अनुसार काष्ठ उद्योगका लागि ल्याइएका काठको सिलबन्दी रुजु गरी फाइल फिर्ता गर्ने क्रममा उनले सेवाग्राहीलाई दुःख हैरानी दिएर घुस मागेका थिए। अख्तियारको बर्दिबास कार्यालयबाट खटिएको टोलीले उनलाई गत असार २४ गते नै १२ हजार रुपैयाँ घुस लिइसकेको अवस्थामा नियन्त्रणमा लिएको  थियाे ।

याे पनि – बन्दीपुर सब–डिभिजन वन कार्यालय प्रमुख १२ हजार घुससहित अख्तियारको ‘ट्रयाप’मा

अनुसन्धानबाट निजले आफ्नो ओहोदाको काम गर्दा काठ ल्याएका ट्रकको सिल खोलेको मुचुल्का गरिदिएबापत विभिन्न बहाना बनाएर बार्गेनिङ गरी १२ हजार रुपैयाँ घुस लिएको पुष्टि भएको आयोगले जनाएको छ ।

अख्तियारले उनलाई भ्रष्टाचार निवारण ऐन, २०५९ को दफा ३(१) बमोजिमको कसुरमा बिगो १२ हजार रुपैयाँ कायम गरी कैद र बिगोबमोजिम जरिवानाको मागदाबीसहित विशेष अदालतमा आरोपपत्र दायर गरेको हो ।

हेर्नुहोस् विज्ञप्ति –