भ्याक्सिनेटरबाट २० प्रतिशत कमिसन लिने कार्यालय प्रमुखसहित दुईविरुद्ध भ्रष्टाचार मुद्दा

काठमाडौँ । सप्तरीको राजविराजस्थित भेटेरिनरी अस्पताल तथा पशु सेवा विज्ञ केन्द्रका कार्यालय प्रमुख डा. राम पवित्र दास र हलुका सवारी चालक भोगेन्द्र यादवले भ्याक्सिनेटरहरूबाट सेवा शुल्कको २० प्रतिशत कमिसन स्वरूप घुस लिएको आरोपमा अख्तियार दुरुपयोग अनुसन्धान आयोगले विशेष अदालतमा आरोपपत्र दायर गरेको छ।

अख्तियारको इटहरी कार्यालयबाट खटिएको टोलीले उनीहरूलाई घुस रकमसहित नियन्त्रणमा लिएको थियो। अनुसन्धानबाट डा. दासले कार्यालय प्रमुखको हैसियतमा कृषकका पशु चौपायालाई खोप लगाउन भ्याक्सिनेटर नियुक्त गरेको र कार्यक्रम सम्पन्न भएपछि कानूनअनुसार पाउनुपर्ने पारिश्रमिक भुक्तानी दिन लगाए बापत चालक भोगेन्द्र यादवसँग मिलेमतो गरी कम्तीमा २० प्रतिशत रकम घुस माग्ने बार्गेनिङ गरेको पाइएको छ।

उनीहरूले भ्याक्सिनेटरहरूलाई बाध्य बनाएर कुल एक लाख बत्तीस हजार तीन सय पचास रुपैयाँ घुस/रिसवत लिएको प्रमाणित भएको आयोगले जनाएको छ।

अख्तियारले यो कार्य भ्रष्टाचार निवारण ऐन, २०५९ को दफा ३ को उपदफा (१) को देहाय (ग) बमोजिमको कसुर भएको ठहर गर्दै विगो एक लाख बत्तीस हजार तीन सय पचास रुपैयाँ कायम गरी कैद र बिगोबमोजिम जरिवानाको मागदाबीसहित विशेष अदालतमा आरोपपत्र दायर गरेको हो।

हेर्नुहोस् विज्ञप्ति –