ग्राहकको कपडा जलाउने ड्राइ क्लिनरलाई १४ हजार जरिवाना

काठमाडौँ । भारतको छत्तीसगढस्थित जिल्ला उपभोक्ता विवाद प्रतितोष आयोगले ग्राहकको शेरवानी (कपडा) इस्त्री गर्ने क्रममा जलाइदिएको भन्दै एक ड्राइ क्लिनिङ पसललाई १४ हजार रुपैयाँ क्षतिपूर्ति तिर्न आदेश दिएको छ ।

आयोगले पसललाई सेवामा लापरबाही ‘Deficiency in Service’ र अनुचित व्यापारिक अभ्यास ‘Unfair Trade Practice’ गरेको ठहर गर्दै शेरवानीको मूल्यबापत ६ हजार रुपैयाँ, मानसिक क्षतिपूर्तिबापत ३ हजार रुपैयाँ र मुद्दा खर्चबापत ५ हजार रुपैयाँ गरी कुल १४ हजार रुपैयाँ तिर्न आदेश दिएको हो ।

रायपुर जिल्ला उपभोक्ता विवाद प्रतितोष आयोगका अध्यक्ष दकेश्वर प्रसाद शर्मा तथा सदस्यहरू निरुपमा प्रधान र अनिलकुमार अग्निहोत्रीको इजलासले ग्राहकले आफ्नो लुगा सावधानीपूर्वक सफा र इस्त्री गरिने विश्वासका साथ जिम्मा लगाएको भए पनि पसलको लापरबाहीका कारण शेरवानीमा क्षति पुगेको निष्कर्ष निकालेको छ । उजुरीअनुसार ग्राहकले सन् २०१९ सेप्टेम्बर ८ मा विवाहमा प्रयोग हुने चार सेट लुगा ड्राइ क्लिनिङ र इस्त्रीका लागि पसलमा दिएका थिए । तीमध्ये करिब १२ हजार रुपैयाँ मूल्यको बेहुलाले लगाउने शेरवानी कोइलाको इस्त्री प्रयोग गर्ने क्रममा दोस्रो बटनमाथिको भाग जलेको थियो ।

घटनापछि ग्राहकले पटक-पटक क्षतिपूर्तिको माग गरे पनि पसलले अस्वीकार गरेपछि उनले प्रहरीमा उजुरी दिएका थिए । प्रहरीले उक्त विषयलाई गैरफौजदारी ‘Non-cognisable’ प्रकृतिको भन्दै उपभोक्ता अदालत जान सुझाव दिएको थियो ।

मुद्दाको सुनुवाइका क्रममा पसलका तर्फबाट कुनै प्रतिनिधि उपस्थित भएनन् । आयोगले ग्राहकले पेस गरेका जलेको शेरवानीका तस्बिर, खरिद बिल, कानुनी नोटिस र प्रहरी उजुरीलाई प्रमाणका रूपमा स्वीकार गर्दै तस्बिरले शेरवानी जलेको स्पष्ट देखिएको उल्लेख गरेको छ ।

आयोगले पसलले ग्राहकको दाबी खण्डन गर्न कुनै प्रमाण पेस नगरेकाले लापरबाही पुष्टि भएको निष्कर्ष निकाल्दै क्षतिपूर्ति दिन आदेश दिएको हो ।