रेशमको उम्मेदवारी खारेजीसम्बन्धी मुद्दा ‘हेर्न नभ्याइने’

काठमाडौँ । नागरिक उन्मुक्ति पार्टीका संरक्षक रेशमलाल चौधरीको उम्मेदवारी खारेजीसम्बन्धी रिट सर्वोच्च अदालतमा आइतबार सुनुवाइ हुन नसकी हेर्न नभ्याइने सूचीमा परेको छ ।

सर्वोच्च अदालतका न्यायाधीश सपना प्रधान मल्ल र अव्दुल अजीज मुसलमानको संयुक्त इजलासमा आजका लागि पेसी तोकिए पनि मुद्दा सुनुवाइ हुन सकेन । अब उक्त रिटको अर्को पेसी पछि तोक्ने जनाइएको छ ।

कैलाली क्षेत्र नम्बर–१ बाट आगामी फागुन २१ मा हुने प्रतिनिधिसभा सदस्य निर्वाचनका लागि दिएको उम्मेदवारी निर्वाचन आयोगले खारेज गरेपछि चौधरीले सर्वोच्च अदालतमा रिट दायर गरेका थिए । यसअघि पनि सर्वोच्चले चौधरीको मागअनुसार अन्तरिम आदेश दिन अस्वीकार गरिसकेको छ ।

टीकापुर घटनामा तीन तहका अदालतबाट दोषी ठहर भई सजाय कायम रहेकै आधारमा निर्वाचन आयोगले उम्मेदवारी खारेज गरेको थियो ।