घुस लिने र दिने दुवैलाई एक–एक महिना कैद गर्न विशेष अदालतको आदेश

काठमाडौँ । विशेष अदालत काठमाडाैँले सेवा उपलब्ध गराएबापत घुस लिएको ठहर गर्दै वीर अस्पतालका लेखा अधिकृत ढुण्डीराज दाहालसहित चार जनालाई दोषी ठहर गरेको छ ।

विशेष अदालतका सदस्य न्यायाधीश नारायणप्रसाद पौडेल र विदुर कोइरालाको इजलासले दाहाल, राजेश श्रेष्ठ, प्रह्लाद गौतम र विलव पोखरेललाई भ्रष्टाचार निवारण ऐन, २०५९ अन्तर्गत कसुरदार ठहर गरेको हो ।

अदालतले अनुसन्धानका क्रममा दाहालले कसुर स्वीकार गरेको बयान, अन्य प्रतिवादीहरूको बयान, घटनास्थलमा खिचिएका श्रव्यदृश्य सामग्री तथा बरामद प्रमाणहरूको आधारमा दाहालले आफूले प्रदान गरेको सेवावापत गैरकानूनी रूपमा ९३ हजार ८५० रुपैयाँ घुस लिएको तथ्य पुष्टि भएको निष्कर्ष निकालेको छ ।

फैसलाअनुसार राजेश श्रेष्ठ, प्रह्लाद गौतम र विलव पोखरेलले समेत उक्त रकम घुसस्वरूप दिएको तथ्य आफ्नो बयानबाट स्वीकार गरेका थिए ।

विशेष अदालतले चारै जनालाई भ्रष्टाचार निवारण ऐनको दफा ३ (१) (क) बमोजिम दोषी ठहर गर्दै जनही २३ हजार ४६२ रुपैयाँ ५० पैसा बिगो कायम गरेको छ । साथै सोही दफाअनुसार प्रत्येकलाई एक महिना कैद र बिगो बराबर थप २३ हजार ४६२ रुपैयाँ ५० पैसा जरिवानाको सजाय सुनाएको छ ।

फैसला हेर्नुहाेस् :