साल्ट ट्रेडिङका सहायक प्रबन्धकविरुद्ध नक्कली शैक्षिक प्रमाणपत्र पेश गरी जागिर र बढुवा लिएको आरोपमा भ्रष्टाचार मुद्दा

काठमाडौं । नक्कली शैक्षिक प्रमाणपत्र पेश गरी सरकारी स्वामित्वको संस्थानमा जागिर प्रवेश र बढुवा समेत लिएको आरोपमा साल्ट ट्रेडिङ कर्पोरेशन लिमिटेडका सहायक प्रबन्धक मनोजकुमार झाविरुद्ध विशेष अदालतमा भ्रष्टाचार मुद्दा दायर गरिएको छ ।

अख्तियार दुरुपयोग अनुसन्धान आयोगले बिहीबार विशेष अदालतमा आरोपपत्र दायर गर्दै झालाले झुट्टा शैक्षिक प्रमाणपत्रका आधारमा सेवा प्रवेश र बढुवा लिई ओहदा, लाभ तथा सुविधा प्राप्त गरेको दाबी गरेको छ ।

आयोगका अनुसार झालाले सन् १९९८ मा Magadh University बाट प्राप्त गरेको भनिएको बीएस्सी तहको मार्कसिट, इमिग्रेसन सर्टिफिकेट, ट्रान्सफर सर्टिफिकेट र प्रोभिजनल सर्टिफिकेटलगायतका कागजात झुट्टा तथा नक्कली रहेको अनुसन्धानबाट खुलेको अख्तियारकाे दाबी छ ।

उक्त प्रमाणपत्रका आधारमा उनले २०६४ सालमा साल्ट ट्रेडिङ कर्पोरेशनको प्रमुख सहायक (सहायक केमिष्ट) पदमा नियुक्ति लिएको र पछि सोही प्रमाणपत्र प्रयोग गरी सहायक प्रबन्धक (सातौँ तह) पदमा बढुवा समेत पाएको अख्तियारको आरोप छ ।

आयोगले उनलाई भ्रष्टाचार निवारण ऐन, २०५९ को दफा १६(१) अन्तर्गतको कसुरमा दोषी ठहर गरी सोही दफाबमोजिम कैद र जरिवानाको सजाय माग गर्दै विशेष अदालतमा आरोपपत्र दायर गरेको जनाएको छ ।

हेर्नुहाेस् प्रेस विज्ञप्ति :