बन्दीपुर सब–डिभिजन वन कार्यालय प्रमुख १२ हजार घुससहित अख्तियारको ‘ट्रयाप’मा

काठमाडौँ । सेवाग्राहीसँग घुस लिएको आरोपमा सिरहाको सब–डिभिजन वन कार्यालय बन्दीपुरका कार्यालय प्रमुख रामकेवल राय यादवलाई अख्तियार दुरुपयोग अनुसन्धान आयोगले नियन्त्रणमा लिएकाे छ ।

उद्योगका लागि ल्याइएको काठ सिलबन्दीअनुसार भए–नभएको जाँच गरी आवश्यक कागजातसहितको फाइल फिर्ता गर्ने प्रक्रियामा अनावश्यक दुःख हैरानी दिँदै रकम मागेको भन्ने उजुरीपछि अख्तियारले निगरानी थालेको थियो ।

त्यसक्रममा अख्तियारको बर्दिवास कार्यालयबाट खटिएको टोलीले यादवलाई सेवाग्राहीबाट १२ हजार रुपैयाँ लिइसकेको अवस्थामा नियन्त्रणमा लिएको जनाएको छ । उनीसँग स्रोत खुलाउन नसकेको थप एक लाख ३३ हजार १२० रुपैयाँसमेत फेला परेपछि कुल एक लाख ४५ हजार १२० रुपैयाँ बरामद गरिएको आयोगले जनाएको छ ।

कारबाहीका क्रममा एक थान मोबाइल फोन पनि बरामद भएको छ । यादवलाई असार २३ गते सिरहाको कर्जन्हा नगरपालिका–४ स्थित मिर्चौयादेखि बन्दीपुर जाने महेन्द्र राजमार्ग क्षेत्रबाट नियन्त्रणमा लिइएको हो ।

अख्तियारले घटनाबारे अदालतबाट आवश्यक अनुमति लिएर थप अनुसन्धान अघि बढाउने जनाएको छ ।

हेर्नुहाेस् प्रेस विज्ञप्ति :