संसद भवनको भग्नावशेष निरीक्षणपछि ऊर्जा मन्त्रीले भने – चुनावअघि नै नयाँ भवन तयार हुन्छ

काठमाडौं । फागुन २१ को निर्वाचनबाट चुनिएर आउने  संघीय संसदको बैठक  नवनिर्मित  भवनमा बस्ने भएको छ । जेनजी आन्दोलनका क्रममा आगजनीबाट पुरानो संसद भवन ध्वस्त भएपछि सरकारले सिंहदरबार परिसरमै निर्माणाधीन नयाँ भवनलाई बैठक स्थलको रूपमा प्रयोग गर्ने तयारी गरेको हो।

सोमबार अन्तरिम सरकारका ऊर्जा, भौतिक तथा शहरी विकासमन्त्री कुलमान घिसिङले सिंहदरबारभित्रको भवन पुस महिनाभित्र तयार हुने जानकारी दिएका छन् । उनका अनुसार आगामी निर्वाचनपछि आउने सांसदहरूले त्यही भवनबाट आफ्नो कार्य प्रारम्भ गर्नेछन्।

घिसिङले जलेर क्षतिग्रस्त भएको नयाँ बानेश्वरको भवन भने पुरानै स्वरूपमा पुनर्निर्माण गरिने बताए। उनले तत्काल सरसफाइ अभियान सुरु गरेर विस्तृत डिजाइनमा आधारित दीर्घकालीन पुनर्निर्माण प्रक्रिया अघि बढाइने उल्लेख गरे।

संसद भवनको निरीक्षणमा घिसिङसँगै अर्थमन्त्री रामेश्वर खनाल र गृह तथा कानुनमन्त्री ओमप्रकाश अर्याल पनि सहभागी थिए। भदौ २३ र २४ गतेको प्रदर्शनका क्रममा संसद भवनलाई मुख्य निशाना बनाइएको थियो, जसका कारण भवन पूर्णरूपमा जलेर ध्वस्त भएको हो।

भिडियोमा हेर्नुहोस् :