सिंहदरबार जलाएको बताउने एक व्यक्ति अनामनगरबाट पक्राउ

काठमाडौँ । सिंहदरबारमा आगजनी गरेको बताउँदै अन्य मानिसहरूलाई उक्साउने र भिडलाई उत्तेजित बनाउने अभिव्यक्ति दिएको आरोपमा प्रहरीले एक व्यक्तिलाई पक्राउ गरेको छ।

जिल्ला प्रहरी परिसर काठमाडौँका अनुसार चितवनको खैरहनी नगरपालिका–१ घर भई हाल काठमाडौँ महानगरपालिका–२९ अनामनगर बस्ने ३६ वर्षीय महेन्द्र गौतमलाई सि‌ंहदरबार जलाएको आरोपमा पक्राउ गरिएको हो।

प्रहरीका अनुसार गत भदौ २४ गते प्रदर्शनका क्रममा सिंहदरबार आगजनी गराएको भनी बताउने तथा अन्य व्यक्तिहरूलाई समेत आगजनी गर्न उक्साउने अभिव्यक्ति दिएको अभियोगमा उनीमाथि अनुसन्धान भइरहेको छ।

काठमाडौँ जिल्ला अदालतबाट पाँच दिनको म्याद थप अनुमति लिई आपराधिक उपद्रव सम्बन्धी कसुरमा अनुसन्धान अगाडि बढाइएको प्रहरीले जानकारी दिएको छ।