उच्च अदालत पाटनमा ‘लालीबजार’ मुद्दाको पुनः सुनुवाइ, विपक्षी झिकाउने आदेश

काठमाडौँ । फिल्म ‘लालीबजार’ प्रदर्शन रोक्न माग गर्दै दायर गरिएको रिट मुद्दामा उच्च अदालत पाटनले पुनः सुनुवाइ अघि बढाएको छ । बुधबार न्यायाधीश गणेशप्रसाद बराल र नारायणप्रसाद सुवेदीको इजलासले विपक्षी पक्षलाई छलफलमा झिकाउने आदेश दिएको छ ।

उच्च अदालत पाटनमा दर्ता भएको मुद्दा नम्बर ०८२-एफएन-१३८३ मा वादी रोशनी नेपालीले सूचना तथा सञ्चार प्रविधि मन्त्रालय सिंहदरबार समेतलाई विपक्षी बनाएकी छन् । यो मुद्दा २०८३ जेठ ४ गते दर्ता भएको थियो ।

सर्वोच्च अदालतको निर्देशनअनुसार यो मुद्दा उच्च अदालतमै फिर्ता भएको हो । यसअघि उच्च अदालतले फिल्म प्रदर्शन खुलाउने गरी, तर अन्तरिम आदेश नदिने निर्णय गरेको थियो । उक्त निर्णयविरुद्ध नेपालीले सर्वोच्च अदालतमा रिट दायर गरेकी थिइन् ।

सर्वोच्चले गत साता फिल्म ‘लालीबजार’ अवलोकन गरी आवश्यक छानबिन गर्न र सात दिनभित्र अन्तरिम आदेश जारी गर्ने वा नगर्नेबारे निर्णय गर्न उच्च अदालत पाटनलाई आदेश दिएको थियो । सोही आदेश कार्यान्वयनका क्रममा बुधबार पुनः सुनुवाइ भएको हो ।आगामी पेशीको मिति भने अझै तोकिएको छैन ।

`लालीबजार` फिल्म हाल सिनेमा हलहरूमा प्रदर्शन भैरहेको छ ।

यो पनि –

उच्च अदालतले भन्यो– लालीबजार फिल्म नदेखाउनू