मौलापुरमा प्रमुख प्रशासकीय अधिकृत नपठाएको भन्दै प्रधानमन्त्री बालेनको पुतला दहन

मौलापुर । रौतहटको मौलापुर नगरपालिकामा प्रमुख प्रशासकीय अधिकृत नपठाएको भन्दै स्थानीयले प्रधानमन्त्री वालेन्द्र शाह (बालेन) को पुतला दहन गरेका छन् ।

स्थानीय बासिन्दाले नगरपालिकामा लामो समयदेखि प्रमुख प्रशासकीय अधिकृतको पद रिक्त रहँदा बजेट कार्यान्वयन, भुक्तानी प्रक्रिया र सेवा प्रवाह प्रभावित भएको भन्दै बिहीबार विरोध प्रदर्शन गरेका हुन् । प्रदर्शनका क्रममा उनीहरूले प्रधानमन्त्री शाह तथा संघीय मामिला तथा सामान्य प्रशासनमन्त्री प्रतिभा रावल विरुद्ध नाराबाजीसमेत गरेका थिए ।

प्रदर्शनकारीले प्रमुख प्रशासकीय अधिकृतको अभावका कारण नगरपालिकाको बजेट कार्यान्वयनमा समस्या उत्पन्न भएको, शिक्षक, सरसफाइ कर्मचारी तथा विभिन्न कार्यक्रमका लाभग्राहीले भुक्तानी नपाएको आरोप लगाएका छन् ।

नगरपालिकामा सरुवा भई आएका प्रमुख प्रशासकीय अधिकृत सुरेशबाबु घिमिरे मन्त्रालय फर्किएपछि हालसम्म नयाँ अधिकृत नपठाइएको स्थानीयको भनाइ छ । त्यसका कारण नगरपालिकाको प्रशासनिक तथा वित्तीय कामकाज प्रभावित भएको उनीहरूको दाबी छ ।

मौलापुरकी मेयर रिना साहले संघीय सरकारले जानाजान प्रमुख प्रशासकीय अधिकृत नपठाएर स्थानीय तहलाई कार्यसम्पादनमा अवरोध सिर्जना गरेको आरोप लगाएकी छन् । बजेट कार्यान्वयन र भुक्तानीको महत्वपूर्ण समयमा कर्मचारी रिक्त राखिएकाले नगरपालिकाको सेवा प्रवाह प्रभावित भएको उनको भनाइ छ ।