सडक निर्माणमा ८ लाख बढी भ्रष्टाचार : तत्कालीन प्रशासकीय अधिकृत सहित १० जना विरुद्द मुद्दा दायर

काठमाडौँ । अख्तियार दुरुपयोग अनुसन्धान आयोगले कालीकोटको पलाँता गाउँपालिकामा सडक निर्माण योजनामा रकम दुरुपयोग गरेको आरोपमा तत्कालीन प्रशासकीय अधिकृत, इन्जिनियर, उपाध्यक्ष, वडाअध्यक्ष र उपभोक्ता समितिका पदाधिकारीसहित १० जना विरुद्द विशेष अदालतमा आरोपपत्र दायर गरेको छ ।

आयोगका अनुसार आर्थिक वर्ष २०७५/७६ मा पलाँता गाउँपालिकाको बेल्केढुङ्गा,लेखनवाडा वडा कार्यालय,दुर्सी फागोटी ग्रामीण सडक निर्माण योजनाका लागि ४० लाख रुपैयाँ बजेट विनियोजन भएको थियो । उपभोक्ता समितिसँग सम्झौता गरी कार्यान्वयन गरिएको योजनामा ग्याबिन जालीसहित ढुंगा भर्ने कार्य १,२०० घनमिटर भएको भन्दै ३८ लाख रुपैयाँ भुक्तानी दिइएको थियो । तर, आयोगको प्राविधिक टोलीले स्थलगत नापजाँच गर्दा मात्र ९३९.५० घनमिटर काम भएको पाइयो । यसरी २६०.५० घनमिटर कम काम  देखाएर रु. ८,०८,६८०.५७ (आठ लाख आठ हजार ६ सय असी रुपैंया सन्ताउन्न पैसा ) बढी भुक्तानी लिएको आयोगको निष्कर्ष छ ।

आयोगले तत्कालीन निमित्त प्रमुख प्रशासकीय अधिकृत राजबहादुर बम, लेखा प्रमुख खिमलाल पुन, सहायक लेखापाल मुनी प्रसाद प्याकुरेल, सब-इन्जिनियर विनोद कुमार बम र नन्दबहादुर सिंहलाई मुख्य प्रतिवादी बनाएको छ । उनीहरूमाथि भ्रष्टाचार निवारण ऐन, २०५९  को दफा ८ अनुसार मिलेमतोमा बढी भुक्तानी दिने कार्य गरेको आरोप छ ।

यस्तै, तत्कालीन उपाध्यक्ष दाना न्यौपाने, वडा नं. ९ का वडाअध्यक्ष टक्कबहादुर बम र उपभोक्ता समितिका अध्यक्ष कुम्भबहादुर बम, कोषाध्यक्ष सुलक्षिणा बम तथा सचिव कमलबहादुर बमलाई पनि सम्बन्धित कसुरमा संलग्न भएको आरोप लगाइएको छ । आयोगले बिगो कायम गरी कैद, जरिवाना र बिगो असुल उपर गर्न मागदाबी गरेको छ ।

हेर्नुहोस् विज्ञप्ति  –