गणेश नेपालीको आत्मदाह घटनाबारे छानबिन गर्न पूर्वन्यायाधीश बाँस्तोलाको अध्यक्षतामा न्यायिक समिति गठन

काठमाडौँ । सरकारले त्रिपुरेश्वरस्थित राहदानी विभाग अगाडि आत्मदाह प्रयास गरी ज्यान गुमाएका मुगुका २५ वर्षीय गणेश नेपालीको घटनाको सत्यतथ्य पत्ता लगाउन उच्च अदालतका पूर्वन्यायाधीश केशवप्रसाद बाँस्तोलाको अध्यक्षतामा न्यायिक समिति गठन गरेको छ ।

बुधबार बसेको मन्त्रिपरिषद् बैठकले यो निर्णय गरेको हो । सरकारका प्रवक्तासमेत रहेका शिक्षामन्त्री सस्मित पोखरेलले यस सम्बन्धमा  जानकारी दिएका छन् ।

गणेश नेपालीले राहदानी विभाग अगाडि आत्मदाह प्रयास गरेका थिए । उनको उपचारका क्रममा वीर अस्पतालमा निधन भएको थियो । यो घटनापछि परिवारले न्याय माग्दै आन्दोलन गरेका थिए । गत असार २८ गते पीडित परिवारसँग सरकारबीच भएको सहमतिअनुसार न्यायिक समिति गठन गरिएको हो ।

समितिले घटनाको पूर्ण छानबिन गरी कारण, जिम्मेवारी र सिफारिससहित प्रतिवेदन पेश गर्नेछ ।

यो पनि – 

• गणेश नेपालीका परिवारसँग नौ बुँदे सहमति, पूर्वन्यायाधीशको नेतृत्वमा छानबिन समिति बन्ने