नक्कली प्रमाणपत्र देखाएर जागिर खाएका इन्जिनियरविरुद्ध मुद्दा दायर 

काठमाडौँ । नक्कली शैक्षिक प्रमाणपत्र पेस गरी सरकारी जागिर खाएको आरोपमा अख्तियार दुरुपयोग अनुसन्धान आयोगले वी.पी. कोइराला स्वास्थ्य विज्ञान प्रतिष्ठानका एक इन्जिनियरविरुद्ध विशेष अदालतमा आरोपपत्र दायर गरेको छ ।

अख्तियारले जारी गरेको प्रेस विज्ञप्तिअनुसार वी.पी. कोइराला स्वास्थ्य विज्ञान प्रतिष्ठान, धरानमा इन्जिनियर (कम्प्युटर) पदमा कार्यरत राकेश कुमार दासले भारतको बिहार स्कूल एक्जामिनेसन बोर्ड, पटनाबाट लिएको भनिएको इन्टरमिडिएट र श्री वेङ्कटेश्वर विश्वविद्यालय, तिरुपतिबाट लिएको भनिएको ब्याचलर अफ इन्जिनियरिङ (कम्प्युटर साइन्स) को प्रमाणपत्र झुट्टा रहेको पुष्टि भएको छ ।

उनी नियुक्ति लिँदा नै नक्कली प्रमाणपत्र पेस गरी इन्जिनियर पदमा नियुक्त भएका र त्यसबाट ओहोदा, लाभ तथा सुविधा समेत लिइरहेका थिए । अख्तियारको अनुसन्धानबाट यो तथ्य खुलेपछि भ्रष्टाचार निवारण ऐन, २०५९ को दफा १६ को उपदफा (१) बमोजिमको कसुर ठहर गरी विशेष अदालतमा आरोपपत्र दायर गरिएको हो।

हेर्नुहोस् विज्ञप्ति –