विजय माल्यालाई अदालतले भन्यो – मुद्दा लड्ने भए देश फर्क

नयाँदिल्ली । भारतको बम्बई हाइकोर्टले बैङ्कबाट अर्बौँ कर्जा अपचलन गरी भागेर बेलायत पुगेका विजय माल्यालाई आफ्नो मुद्दा अघि बढाउने भएका स्वदेश फर्कन भनेको छ ।

भगौडा भई बेलायत बसेर भारतको सरकारी नियामकबाट उन्मुक्ति खोजिरहेका माल्यालाई बम्बई हाइकोर्टले चेतावनी नै दिएको छ । अदालतले स्वदेश फर्कन नसक्ने भए भगौडा आर्थिक अपराधी ऐनविरुद्ध माल्याले दायर गरेको रिटमाथि सुनुवाई हुन नसक्ने पनि बताइदिएको छ ।

प्रमुख न्यायाधीश श्री चन्द्रशेखर र न्यायाधीश गौतम अखण्डको इजलासले यदि माल्याको मागबमोजिम उल्लेखित ऐनको वैधतालाई चुनौती दिने माल्याको रिटमाथि विचार गर्नका लागि निज भारत फर्कनुपर्ने बताएको हो ।

इजलासले ऐन बमोजिम भगौडा आर्थिक अपराधी घोषित गर्ने सरकारी प्रक्रियाविरुद्ध माल्याले दायर गरेको रिटविरुद्ध सुनुवाई गरेको हो ।

अदालतले भनेको छ, ‘माल्याले भारत र बेलायतका अदालती प्रक्रियाबाट बच्न खोजेकाले निजले दायर गरेको रिटबाट फाइदा लिन सक्दैनन् ।’

माल्याले रिटमा आफूसँग पैसा फिर्ता मागेर बैङ्कहरूले गल्ती गरेको लेखेका छन् ।