बेचन झा रिहा, अदालतले सजाय तोक्नुअघि नै सकियो जेलको बास !

काठमाडौँ । नक्कली भुटानी शरणार्थी प्रकरणमा पक्राउ परेर दुई वर्षदेखि कारागारमा रहेका बेचन झा रिहा भएका छन् । जिल्ला अदालत काठमाडौंको आदेशपछि आवश्यक कानुनी प्रक्रिया पूरा गरी बुधबार उनलाई सुन्धारा कारागारबाट रिहा गरिएको हो ।

जिल्ला अदालत काठमाडौंले मंगलबार ठगी मुद्दामा झालाई एक वर्ष कैद र १० हजार रुपैयाँ जरिबानाको सजाय सुनाएको थियो । तर, उनी २०८१ असार १४ गते पक्राउ परेदेखि नै पुर्पक्षका लागि कारागारमा रहेकाले अदालतले निर्धारण गरेको कैद अवधिभन्दा बढी समय बिताइसकेका थिए । सोही आधारमा उनलाई रिहा गरिएको हो ।

जिल्ला अदालत काठमाडौंका प्रवक्ता शिव खतिवडाका अनुसार झाको रिहाइका लागि अदालतले मंगलबार राति नै कारागार प्रशासनलाई पत्राचार गरेको थियो । त्यसपछि आवश्यक प्रशासनिक प्रक्रिया पूरा गरी बुधबार उनलाई कारागारमुक्त गरिएको हो ।

रिहाइसँगै झाले सम्पत्ति शुद्धीकरण अनुसन्धान विभाग र अख्तियार दुरुपयोग अनुसन्धान आयोगसँग सम्बन्धित कानुनी प्रक्रिया भने सामना गर्नुपर्नेछ । ती निकायसँग सम्बन्धित प्रक्रिया पूरा भएपछि उनी तारेखमा रहने जनाइएको छ ।

यसअघि यही प्रकरणमा सफाइ पाएका प्रतीक थापासमेत सम्बन्धित निकायको प्रक्रिया पूरा गरी तारेखमा बस्ने गरी रिहा भएका थिए ।

याे पनि – नक्कली भुटानी शरणार्थी प्रकरण  : अदालतको ऐतिहासिक फैसलाले उजागर गर्‍यो राज्यविरुद्धको संगठित अपराध