टुङ्गो लागेन सुकुम्बासीको मुद्दा, शुक्रबारलाई तोकियो पेशी

काठमाडौँ । सर्वोच्च अदालतमा काठमाडौँ उपत्यकाका सुकुम्बासी बस्ती हटाउने विवादमा दायर भएका तीन प्रमुख रिटमाथिको सुनुवाइ आज बिहीबार पनि स्थगित भएको छ । अदालतले भोलि वैशाख २५ गतेका लागि पेशी तोकेको छ ।

थापाथली, मनोहरालगायत क्षेत्रमा डोजर चलेपछि विस्थापित भएका सुकुम्बासीहरूको आवास अधिकार र सरकारको निस्कासन प्रक्रियाबारे चर्किएको यो बहस अझै टुङ्गो लाग्न सकेको छैन ।

मुद्दा नं. ०८२-WO-११९५ मा गोपाल रन पहेली लगायतले थापाथली बस्तीबाट जबर्जस्ती हटाइएको विरोधमा २०८३ वैशाख ११ गते दायर रिट,मुद्दा नं. ०८२-WO-११९७ मा वरिष्ठ अधिवक्ता दिनेश त्रिपाठीले २०८३ वैशाख १४ गते देशभरिका सुकुम्बासी तथा भूमिहीनको आवास अधिकार संरक्षण गर्न माग गर्दै दायर गरेको रिट र मुद्दा नं. ०८२-WO-१२३७ मा माजिद अन्सारी समेत ४ जनाले २०८३ वैशाख १७ गते काठमाडौँका नदी किनार र सार्वजनिक जग्गाका सुकुम्बासी बस्ती हटाउने कार्यविरुद्ध दायर गरेको रिट हेर्दाहेर्दै स्थगित भएर भोलि वैशाख २५ गतेका लागि पेशी तोकिएको छ ।

तीनवटै मुद्दालाई एकसाथ जोडेर लगाबमा सुनुवाइ भइरहेको छ । अदालतले सरकारलाई सुकुम्बासी बस्ती खाली गर्दा अपनाइएको प्रक्रिया, कानुनी आधार, निर्णयका कागजात र विस्थापित परिवारलाई आवास, खाना, स्वास्थ्य तथा बालबालिकाको शिक्षाको व्यवस्था गरेको विवरण पेश गर्न निर्देशन दिइसकेको छ ।

आजको पेशी स्थगित भएसँगै यस विषयमा भोलि वैशाख २५ गते थप छलफल हुने भएको छ ।

यो पनि –

सर्वोच्चमा सुकुम्बासीबारे आज पनि सुनुवाइ