रविसँग जोडिएका फरार अभियुक्त जीबी राईको अभियोग फिर्ता लिने महान्यायाधिवक्ताको निर्णय

२ माघ २०८२

काठमाडौँ । सहकारी ठगी, संगठित अपराध र सम्पत्ति शुद्धीकरणको मुद्दामा फरार रहेका अभियुक्त जीवी राईको समेत संगठित अपराध र सम्पत्ति शुद्धीकरणसम्बन्धी अभियोग फिर्ता लिन महान्यायाधिवक्ता सविता भण्डारीले स्वीकृति दिएकी छिन् ।

रवि लामिछानेसँग जोडिएको संगठित अपराध र सम्पत्ति शुद्धीकरणसम्बन्धी अभियोग फिर्ता लिने निर्णय गरेपछि विवादमा तानिएसँगै महान्यायाधिवक्ता भण्डारीले रविसँग जोडिएका सबै प्रतिविादीको संगठित अपराध र सम्पत्ति शुद्धीकरणसम्बन्धी अभियोग फिर्ता लिने निर्णय गरेको शुक्रबार राष्ट्रिय पत्रपत्रिकामा समाचार प्रकाशित भएको छ ।

महान्यायाधिवक्ताको यो निर्णयसँगै अब रवि लामिछाने र गोरखा मिडियासँग जोडिएका सबै मुद्दाका अभियुक्तहरुले संगठित अपराध र सम्पत्ति शुद्धीकरणको अभियोगबाट छुटकारा पाउने भएका छन् ।