पशुपति क्षेत्रमा प्रहरीमाथि आक्रमण गर्ने युवक पक्राउ

काठमाडौँ । महाशिवरात्रिको अवसरमा पशुपतिनाथ मन्दिर क्षेत्रमा ड्युटीमा खटिएका प्रहरीमाथि हातपात गर्ने एक युवकलाई प्रहरीले पक्राउ गरेको छ ।

जिल्ला प्रहरी परिसर काठमाडौंका प्रमुख एसएसपी रमेश थापाका अनुसार पक्राउ पर्नेमा मकवानपुरको ठुलदमार स्थायी घर भई हाल काठमाडौं महानगरपालिका–१३ चागल बस्दै आएका २५ वर्षीय रिजन श्रेष्ठ रहेका छन् ।

प्रहरीका अनुसार श्रेष्ठले ड्युटीमा रहेका एक प्रहरीको छातीमा लात प्रहार गरेका थिए । घटनाको भिडियो सामाजिक सञ्जालमा व्यापक रूपमा फैलिएको थियो, तर सुरुआतमा आक्रमणकारीको पहिचान खुल्न सकेको थिएन ।

मंगलबार प्रहरीले सार्वजनिक सूचना जारी गर्दै ती युवकको पहिचानका लागि सर्वसाधारणसँग सहयोग मागेको थियो । त्यसपछि संकलित सूचनाका आधारमा उनलाई नियन्त्रणमा लिइएको प्रहरीले जनाएको छ । घटनाबारे थप अनुसन्धान भइरहेको प्रहरीले जनाएको छ ।