पूर्व एसएसपीकाे जग्गा घिताे राखेर चार कराेड ऋण, तीन जना पक्राउ

जनकपुरधाम । नेपाल प्रहरीका पूर्ववरिष्ठ प्रहरी उपरीक्षक (एसएसपी) गोविन्दकुमार साहले धितोमा रहेको आफ्नो जग्गा पुनः धितो राखेर चार करोड रुपैयाँ ऋण लिइएको भन्दै ठगीमा परेको उजुरी दिएका छन् ।

साहका अनुसार उनले २०७९ सालमा ९९ लाख रुपैयाँ ऋण लिँदा पत्नीको नाममा रहेको धनुषाको विदेह नगरपालिका–६ स्थित जग्गा दृष्टिबन्धक राखेका थिए । तर आफूलाई जानकारी नै नदिई सोही जग्गा पुनः धितो राखेर चार करोड रुपैयाँ ऋण लिइएको थाहा पाएपछि धनुषा प्रहरीमा उजुरी दिएका हुन् ।

उनको जाहेरीका आधारमा धनुषा प्रहरीले ठगीको आरोपमा स्थानीय गोपाल साह, उनकी पत्नी रेखाकुमारी साह तथा छोरा हरेराम साहलाई पक्राउ गरेको छ ।