मिसिल क्षतिले सर्वोच्च अदालतको मुद्दा फर्छ्यौट लक्ष्य प्रभावित

काठमाडौँ । सर्वोच्च अदालतका मिसिलमा अकल्पनीय क्षति पुगेका कारण आर्थिक वर्ष २०८२/०८३ मा लक्ष्यअनुसार मुद्दा फछ्र्योट हुन सकेन । अदालतले उक्त वर्ष २७ हजार ४६७ मुद्दा फछ्र्योट गर्न असफल रह्यो ।

गत भदौ २४ गते जेनजी आन्दोलनका क्रममा अदालतमा भएको आगजनीले मिसिलमा ठूलो क्षति पुर्‍याएको थियो । यसका कारण तोकिएको समयसीमाभित्र इजलास बस्न नसक्दा दर्ता भएकामध्ये जम्मा ११ हजार ४६९ वटा मुद्दा मात्र फछ्र्योट भए । अदालतले उक्त आर्थिक वर्षमा १९ हजार ६७९ मुद्दा फछ्र्योट गर्ने लक्ष्य राखेको थियो भने कुल मुद्दाको संख्या ३८ हजार ९३६ पुगेको थियो ।

सर्वोच्च अदालतका प्रवक्ता अर्जुनप्रसाद कोइरालाले भने, ‘गत भदौ २४ गते जेनजी आन्दोलनका क्रममा अदालतमा आगजनी भई अकल्पनीय क्षति पुगेकाले लामो समयसम्म इजलास बस्न सकिएन । मिसिल पत्ता लगाउन कठिनाइ भएकाले मुद्दा फछ्र्योटमा ढिलाइ भयो ।’

आगजनीपछि मिसिल व्यवस्थापन र पुनर्निर्माणमा समय लाग्दा अदालतको नियमित काममा गम्भीर असर परेको देखिएको छ । यसबाट न्याय सम्पादन प्रक्रियामा अवरोध सिर्जना भएको र सेवाग्राहीलाई समेत अप्ठ्यारो परेको अवस्था छ ।