केएसएलद्वारा बि. ए. एलएल. बी. प्रवेश परीक्षाको नतिजा सार्वजनिक

काठमाडौँ । काठमाडौँ स्कुल अफ ल (केएसएल) ले बि ए एल एल बी कार्यक्रमको प्रवेश परीक्षाको नतिजा प्रकाशित गरेको छ । २६ असारसम्म अनलाइन फाराम भर्ने समय दिइएको उक्त परीक्षा २७ र २८ असारमा सम्पन्न भएको थियो । नतिजा अनुसार मेरिट लिस्टमा २५० जना विद्यार्थी छनोट भएका छन् भने ३८ जना वेटिङ लिस्ट र ७ जना विथहेल्ड लिस्टमा रहेका छन् ।

मेरिट लिस्टमा नाम निकालेका विद्यार्थीले साउन १ देखि ८ सम्म (शनिबार बाहेक) भर्ना प्रक्रिया पूरा गर्नुपर्ने छ । कलेजले पहिलो किस्ता र सरकारले निर्धारण गरेको ३ प्रतिशत शैक्षिक समानता शुल्कसहित कुल  १ लाख १३ हजार ५०६ रुपैयाँ जम्मा गर्न भनिएकाे छ । यो रकम १ श्रावणपछिमात्र जम्मा गर्न सकिनेछ ।

वेटिङ लिस्टमा रहेका विद्यार्थीलाई मेरिट लिस्टका विद्यार्थीले सीट भर्ना नगरेको अवस्थामा मात्र अवसर दिइनेछ। यसका लागि कलेजले छुट्टै सूचना निकाल्ने जनाएको छ । यसैगरी, विथहेल्ड लिस्टमा रहेका ७ जना विद्यार्थीले तत्काल कलेज प्रशासनसँग सम्पर्क गरी बाँकी प्रक्रिया पूरा गर्नुपर्ने छ। 

भर्ना प्रक्रियाका लागि सफल उम्मेदवारहरूले मूल प्रमाणपत्रसहित सबै आवश्यक कागजात बोकेर कार्यालय समयभित्र (बिहान ९ बजेदेखि दिउँसो ४ बजेसम्म) उपस्थित हुनुपर्ने कलेजले जनाएको छ ।