ट्रम्प भन्छन् ‘इरानसँग वार्ता भयो’, इरान भन्छ ‘हामीलाई थाह छैन’

काठमाडौँ । इरानले अमेरिकासँग शान्ति वार्ता भइरहेको भन्ने अमेरिकी राष्ट्रपति डोनाल्ड ट्रम्पको दाबी अस्वीकार गरेको छ ।

ट्रम्पले सोमबारदेखि इरानसँग युद्ध अन्त्य गर्ने उद्देश्यले नयाँ चरणको वार्ता सुरु हुने भन्दै त्यसकै लागि इरानमाथि गर्ने भनिएको ‘ठूलो’ सैन्य आक्रमण स्थगित गरेको बताएका थिए । तर, इरानले आफू अमेरिकासँग कुनै वार्तामा नरहेको र तत्काल वार्ता गर्ने योजना पनि नभएको स्पष्ट पारेको छ ।

इरानले अमेरिकासँग वार्ता नभएको दाबी गरेपछि ट्रम्पले इरानी नेतृत्वको आलोचना गर्दै वार्ता भइरहेको भन्ने कुरामा अडान लिइराखेका छन् ।

यसैबीच, ट्रम्पको वार्ताको घोषणापछि एसियाली बजारमा तेलको मूल्य घटेको छ । विश्वको करिब २० प्रतिशत कच्चा तेल तथा एलएनजी आवतजावत हुने होर्मुज जलमार्गमा तनाव बढेसँगै पछिल्लो समय विश्वव्यापी ऊर्जा बजार प्रभावित हुँदै आएको छ ।