नक्कली प्रमाणपत्र बुझाएर बालविकास सहजकर्ताको जागिर, लाग्यो भ्रष्टाचार मुद्दा

काठमाडौँ । नक्कली शैक्षिक प्रमाणपत्र पेश गरी बालविकास सहजकर्ताको जागिर खाएकी एक महिलाविरुद्ध भ्रष्टाचार मुद्दा दायर भएको छ ।

पाँचथरको हिलिहाङ गाउँपालिका-७ स्थित श्री जय भवानी माध्यमिक विद्यालय अन्तर्गत सञ्चालित वालविकास केन्द्रमा कार्यरत सहयोगी कार्यकर्ता बिना कुमारी राईविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको हो ।

नक्कली शैक्षिक योग्यताको प्रमाणपत्र पेस गरी जागिर गरिरहेको भनी परेको उजुरीका सम्बन्धमा अनुसन्धान हुँदा प्रतिवादी राईले उल्लेखित विद्यालयमा बालविकास सहजकर्ता निय्क्त हुन कक्षा आठ र प्रवेशिका परीक्षा (एसएलसी) का झुट्टा तथा नक्कली शैक्षिक योग्यता प्रमाणपत्र पेश गरी सरकारी सेवा सुविधासमेत प्राप्त गरेको पुष्टि भएको आयोगले आरोपपत्रमा उल्लेख गरेको छ ।

आयोगले राईलाई भ्रष्टाचार निवारण ऐन, २०५९ को दफा १६ को उपदफा (१) बमोजिमको कसुरमा सोही ऐनको दफा १६ को उपदफा ९१० बमोजिम कैद र जरिवाना सजाय हुन मागदाबी लिई आज विशेष अदालत, काठमाडौँमा आरोपपत्र दायर गरेको हो ।