सोमबारदेखि अमेरिका-इरान वार्ता सुरु हुँदै

काठमाडौं । अमेरिकी राष्ट्रपति डोनाल्ड ट्रम्पले इरानसँग नयाँ चरणको वार्ता सोमबार (नेपाली समयअनुसार आज राति) देखि सुरु हुने बताएका छन् । इरानमाथि ठूलो सैन्य कारबाहीको तयारी भइरहेको अवस्थामा त्यसलाई तत्कालका लागि रोक्दै उनले कूटनीतिक माध्यमबाट समाधान खोज्ने प्रयास अघि बढाएका हुन् ।

आइतबार एयर फोर्स वनमा सञ्चारकर्मीसँग कुरा गर्दै ट्रम्पले इरानमाथि प्रस्तावित सैन्य कारबाही निकै ठूलो स्तरको हुने दाबी गरे। उनका अनुसार खाडी क्षेत्रका अमेरिकी साझेदार मुलुक र इरान दुवै पक्षबाट वार्ताका लागि आग्रह भएपछि आफूले सैन्य योजना केही समयका लागि स्थगित गरेका हुन् ।

ट्रम्पले इरानमाथि हुने भनिएको सम्भावित आक्रमणको तयारीबारे इरानलाई जानकारी रहेको र त्यसको सम्भावित प्रभावबारे पनि तेहरान जानकार रहेको बताएका छन् । यद्यपि, उनले वार्ता सफल हुने वा त्यसको अन्तिम परिणामबारे कुनै निश्चित प्रतिबद्धता व्यक्त गरेका छैनन् ।

अमेरिकी राष्ट्रपतिका अनुसार सोमबार दिउँसोबाट वार्ता अघि बढ्नेछ । तर वार्ता कुन स्थानमा हुनेछ र अमेरिकी तथा इरानी पक्षबाट प्रतिनिधित्व कसले गर्नेछन् भन्ने विषयमा उनले विस्तृत जानकारी दिएका छैनन् ।

यसअघि शनिबार ट्रम्पले अमेरिका र इरानबीच सम्भावित सम्झौताको प्रारम्भिक ढाँचा तयार हुन सक्ने संकेत गरेका थिए । त्यसपछि उनले इरानमाथि सैन्य कारबाही गर्ने आफ्नो अडानलाई केही समयका लागि नरम बनाएका हुन् ।

वार्ता सुरु हुने घोषणासँगै अमेरिका-इरान तनाव तत्काल सैन्य टकरावमा परिणत हुने जोखिम केही कम भएको देखिएको छ । यद्यपि, दुई देशबीच आणविक कार्यक्रम, प्रतिबन्ध, क्षेत्रीय सुरक्षा र रणनीतिक समुद्री मार्गजस्ता विषयमा रहेको मतभेद समाधान गर्न वार्ता कति प्रभावकारी हुन्छ भन्ने प्रश्न भने कायमै छ ।