काठमाडौं जिल्ला अदालतको भवनमा रातो स्टिकर, विस्तृत क्षति मूल्याङ्कन गर्न माग

काठमाडौं । जनजी आन्दोलनका क्रममा भएको तोडफोड र आगजनीका कारण क्षति पुगेको काठमाडौं जिल्ला अदालत भवनको विस्तृत मूल्याङ्कन गर्न नेपाल इन्जिनियर एसोसिएसनलाई अदालतले पत्राचार गरेको छ ।

अदालत प्रशासन शाखाबाट भदौ ३० गते जारी गरिएको पत्रमा अदालतको मूल भवनमा भएको क्षतिको प्रारम्भिक जाँचका क्रममा भवनलाई रातो स्टिकर टाँस गरिएको र भवन प्रयोग योग्य नरहेको देखिएको उल्लेख छ । भवन प्रयोग अयोग्य देखिएकाले विस्तृत क्षति मूल्याङ्कन गरी सोको प्रतिवेदन पेस गर्न जिल्ला अदालतले माग गरेको छ ।

भदौ २३ र २४ गते अदालतमा भएको आगजनी र तोडफोडबाट जिल्ला अदालतको मूल भवनमा क्षति पुगेको थियो । अदालतको संरचना पुनः प्रयोग गर्न सकिने वा नसकिने विषयमा प्राविधिक प्रतिवेदन आवश्यक देखिएको भन्दै विस्तृत मूल्याङ्कन माग गरिएको हो ।