सर्वोच्चको अन्तरिम आदेशपछि धनुषा–१ का रास्वपा उम्मेदवारको नाम कालोसूचीबाट हट्ने

काठमाडौँ । सर्वोच्च अदालतले धनुषा–१ बाट प्रतिनिधिसभा निर्वाचनमा उम्मेदवार बनेका किशोरी साह कमलको नाम कालोसूचीमा नराख्न अन्तरिम आदेश दिएको छ। अदालतले कर्जा सूचना केन्द्रलाई उक्त नाम हटाउन अन्तरिम आदेश जारी गरेको हो ।

न्यायाधीश शारङ्गा सुवेदीको एकल इजलासले साहको रिटमाथि प्रारम्भिक सुनुवाइ गर्दै यस्तो आदेश दिएको हो । कर्जा सूचना केन्द्रको कालोसूचीमा नाम परेको भन्दै निर्वाचन आयोगले उनको उम्मेदवारी खारेज गरेको थियो ।

धनुषा–१ बाट राष्ट्रिय स्वतन्त्र पार्टीका तर्फबाट उम्मेदवार बनेका साहले उम्मेदवारी रद्द भएपछि कर्जा सूचना केन्द्रलाई विपक्षी बनाएर सर्वोच्चमा रिट दायर गरेका थिए । अदालतको अन्तरिम आदेशसँगै कालोसूचीबाट उनको नाम हट्ने र उम्मेदवारी कायम रहने सम्भावना बढेको कानुन व्यवसायी दिपेन्द्र झाले बताएका छन् ।

यसअघि निर्वाचन हुनुभन्दा दुई दिनअघि मात्र निर्वाचन आयोगले साहको उम्मेदवारी खारेज गर्ने निर्णय गरेको थियो । सो निर्णयविरुद्ध दायर रिटमाथि अदालतमा शुक्रबार थप सुनुवाइ हुने तय भएको छ ।

उता धनुषा–१ मा साहको उम्मेदवारी रद्द भए पनि राष्ट्रिय स्वतन्त्र पार्टीको चुनाव चिह्न ‘घण्टी’मा उल्लेख्य मत परेको थियो । तर आयोगले सो क्षेत्रबाट मात्रिका यादवलाई निर्वाचित भएको घोषणा गरिसकेको छ ।